រដ្ឋមន្ដ្រីសុខាភិបាល អំពាវនាវដល់ពលរដ្ឋដែលមានអាយុចាប់ពី៤០ឆ្នាំឡើងទៅ សូមទៅពិនិត្យសុខភាព ពិសេសធ្វើតេស្ដរកជាតិស្ករក្នុងឈាម ដើម្បីការពារ និងងាយព្យាបាលជំងឺទឹកនោមផ្អែមទាន់ពេល

 រដ្ឋមន្ដ្រីសុខាភិបាល អំពាវនាវដល់ពលរដ្ឋដែលមានអាយុចាប់ពី៤០ឆ្នាំឡើងទៅ សូមទៅពិនិត្យសុខភាព ពិសេសធ្វើតេស្ដរកជាតិស្ករក្នុងឈាម ដើម្បីការពារ និងងាយព្យាបាលជំងឺទឹកនោមផ្អែមទាន់ពេល

(ភ្នំពេញ)៖ លោកសាស្ដ្រាចារ្យ ឈាង រ៉ា រដ្ឋមន្ដ្រីក្រសួងសុខាភិបាល បានថ្លែងអំពាវនាវដលប្រជាពលរដ្ឋ ដែលមានមានអាយុ​ចាប់ពី៤០ឆ្នាំឡើង ត្រូវប្រញាប់ទៅពិនិត្យសុខភាព ជាពិសេសធ្វើតេស្ដរកជាតិស្ករនៅក្នុងឈាម ដើម្បីការពារ និងងាយព្យាបាលជំងឺទឹកនោមផ្អែមទាន់ពេលវេលា។

ការថ្លែងដូច្នេះលោកសាស្ដ្រាចារ្យរដ្ឋមន្ដ្រី ក្នុងឱកាសអញ្ជើញជាអធិបតីភាពក្នុងទិវាជំងឺទឹកនោមផ្អែមពិភពលោក ក្រោមប្រធានបទ «ការទទួលបាននូវការថែទាំជំងឺទឹកនោមផ្អែម» ដែលរៀបចំឡើងដោយក្រសួងសុខាភិបាល រួមសហការជាមួយអង្គការសុខភាពពិភពលោកប្រចាំកម្ពុជា(WHO)។

លោករដ្ឋមន្ដ្រីបានថ្លែងបន្ដថា ផលប៉ះពាល់នៃជំងឺទឹកនោមផ្អែម គឺធ្ងន់ធ្ងរណាស់សម្រាប់សុខភាព ដូច្នេះសូមអំពាវដល់ប្រជាពលរដ្ឋយើងទាំងអស់ ត្រូវយកចិត្ដទុកដាក់ខ្ពស់ពិសេសត្រូវប្រុងប្រយ័ត្នកុំឱ្យកើតនូវជំងឺទឹកនោមផ្អែម។

លោកសាស្ដ្រាចារ្យរដ្ឋមន្ដ្រីបន្ដថា «ត្បិតណាស់ជំងឺទឹកនោមផ្អែម មានផលប៉ះពាល់ធ្ងន់ធ្ងរដល់សុខភាព អាចបង្កផលវិបាកឱ្យកើតមានជំងឺគាំងបេះដូង គ្រោះថ្នាក់សរសៃឈាមខួរក្បាល ពិការភ្នែក ខ្សោយតម្រងនោម និងពិការអវៈយវៈ ជាដើម។ ប៉ុន្ដែជំងឺនេះអាចការពារបាន និងចៀសវាងបាន ហើយបើឈឺហើយ ក៏អាចការពារដោយការព្យាបាល។ ដូច្នេះសូមប្រជាពលរដ្ឋយើងប្រញាប់ទៅធ្វើតេស្ដរកជាតិស្ករក្នុងឈាម ដើម្បីបានដឹង និងព្យាបាលទាល់ពេលវេលា»។

លោកសាស្រ្ដាចារ្យបានថ្លែងបន្ថែមថា ក្នុងនាមក្រសួងសុខាភិបាល សូមអំពាវនាវដល់ប្រជាពលរដ្ឋប្រញាប់ទៅពិនិត្យសុខភាព ជាពិសសទៅមើលជាតិស្ករក្នុងខ្លួន ដែលជាកាតព្វកិច្ចក្នុងការពារគ្រួសារខ្លួននីមួយៗ ដែលចៀសវាងនូវការខាតបង់នូវថវិកា នៅក្នុងចំណាយលើជំងឺនោមផ្អែមនេះ និងសូមចួលរួមការពារសុខភាព ហើយបើពិនិត្យឃើញជំងឺទឺកនោមផ្អែម សូមទទួលការព្យាបាលឱ្យបានត្រឹមត្រូវ និងពិនិត្យសុខភាពឱ្យបានទៀងទាត់តាមការណាត់របស់គ្រូពេទ្យ។

ក្នុងឱកាសនោះលោករដ្ឋមន្ដ្រីក៏បានផ្ដល់សារគន្លឹះចំពោះអ្នកកើតជំងឺនោមផ្អែម ដើម្បីចៀសវាងពីជំងឺទឹកនោមផ្អែម រួមមាន៖

១៖​ រក្សាទម្ងន់ (កុំឱ្យឡើងលើសទម្ងន់)

២៖ សូមធ្វើលំហាត់ប្រាណ

៣៖ ការបរិភោគ ចៀសវាងអាហារដែលមានផលប៉ះពាល់ ដូចជាភេសជ្ជៈផ្អែម អាហារផ្អែម (ដែលមានជាតិស្ករច្រើន) ឬសាច់ក្រហម

៤៖ ត្រូវទៅពិនិត្យសុខភាព គឺធ្វើតេស្ដរកជាតិស្ករ

៥៖ ធ្វើការព្យាបាល

សម្រាប់អ្នកមិនទាន់កើតជំងឺទឹកនោមផ្អែមវិញ ដើម្បីការពារ គឺទោះបីជាក្មេងក៏ដោយ កុំឱ្យពិសាទឹកក្រូច ទឹកដែលផ្អែម និងជំនួសដោយទឹកសុទ្ធ។ លើសពីនោះចាប់ពីពេញវ័យឡើងទៅ ត្រូវបរិភោគអាហារដែលមានសុខភាពល្អ កាត់បន្ថយអាហារផ្អែម ប្រៃ និងសំបូរកាឡូរីលើសពីតំរូវការ ព្រមទាំងការហាត់ប្រាណត្រឹមត្រូវទៀងទាត់ រក្សាទម្ងន់ក្នុងកម្រិតល្អ ការកាត់បន្ថយការទទួលទានគ្រឿងស្រវឹងប្រកបដោយគ្រោះថ្នាក់ និងកុំពិសារបារី៕

(សូមអានបន្ត)

នៅព្រឹកថ្ងៃទី ២០ ខែវិច្ឆិកានេះ ​ភ្ញៀវទេសចរអន្តរជាតិ​ជាច្រើនកុះករ មកទស្សនាថ្ងៃរះ នៅប្រាសាទអង្គរវត្ត

  សៀមរាបៈ នៅព្រឹកថ្ងៃទី ២០ ខែវិច្ឆិកា ឆ្នាំ២០២៣ នេះ ភ្ញៀវទេសចរ អន្តរជាតិ ជាច្រើនកុះករ បានមកទស្សនាមើលថ្ងៃរះ នៅប្រាសាទអង្គរវត្ត ខេត្តសៀមរាប។

លោក ណន ណៃ មគ្គុទ្ទេសទេសរណ៍ ១រូប ប្រចាំតំបន់សៀមរាបអង្គរ បាននិយាយនៅ ព្រឹកថ្ងៃទី ២០ ខែវិច្ឆិកា នេះថា នៅព្រឹកនេះ ភ្ញៀវទេសចរបរទេស ខ្ទង់ជាង ១.០០០ នាក់ មកទស្សនាមើលថ្ងៃរះ នៅប្រាសាទអង្គរវត្ត ខេត្តសៀមរាប។

លោក បាននិយាយថា នៅព្រឹកនេះ ភ្ញៀវទសេចរ ភាគច្រើន ជាភ្ញៀវមកពអឺរ៉ុប ហើយ ព្រឹកនេះ ក៏ដូចជាព្រឹករាល់ថ្ងៃដែរ ដែលភ្ញៀវនិយម មកមើលថ្ងៃរះនេះ។

លោកបានបន្តថា មគ្គុទ្ទេសទេសក៍ទេសចរណ៍ មានកាងារធ្វើជាបណ្តើៗហើយ ដោយសារការមកដល់របស់ភ្ញៀវគ្រប់ជាតិសាសន៍ មកទស្សនារមណីយដ្ឋានប្រវត្តិសាស្រ្ត តំបន់សៀមរាបអង្គរ ខេត្តសៀមរាប យើងនេះ។

បើតាមផ្នែកវិស័យទេសចរណ៍ បាននិយាយជាបន្តបន្ទាប់ កន្លងមកនេះថា ក្រោយពីបើក ឱ្យប្រើប្រាស់ព្រលានយន្តហោះអន្តរជាតិថ្មីនេះហើយ ភ្ញៀវទេសចរ អន្តរជាតិ ក្នុង ១ថ្ងៃ មានការចុះថតយន្តហោះជាង ១០ ជើង ដោយនាំភ្ញៀវរាប់ពាន់នាក់ មកជាមួយ មានន័យថា សន្ទុះភ្ញៀវផ្ទុះឡើង យ៉ាងគំហុកហើយ៕/V/r

(សូមអានបន្ត)

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ឱកាសអញ្ជើញប្រកាសដាក់ឱ្យអនុវត្តកម្មវិធីនយោបាយអាទិភាព ពាក់ព័ន្ធវិស័យកសិកម្ម

(ភ្នំពេញ)៖ នៅព្រឹកថ្ងៃចន្ទ ៨កើត ខែកត្ដិក ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២០ ខែវិច្ឆិកា ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញប្រកាសដាក់ឱ្យអនុវត្តជាផ្លូវការនូវកម្មវិធីនយោបាយចំនួន៣ទៀត ពាក់ព័ន្ធនឹងវិស័យកសិកម្ម។

ខាងក្រោមជាខ្លឹមសារសំខាន់ៗរបស់សម្តេចធិបតី ហ៊ុន ម៉ាណែត ឱកាសអញ្ជើញប្រកាសដាក់ឱ្យអនុវត្តកម្មវិធី នយោបាយអាទិភាព ពាក់ព័ន្ធវិស័យកសិកម្ម៖

* សម្តេចធិបតី ហ៊ុន ម៉ាណែត បានថ្លែងថា សម្តេចមានសេចក្តីសោមនស្សរីករាយ ដែលបានអញ្ជើញប្រកាសដាក់ឱ្យអនុវត្តកម្មវិធីនយោបាយអាទិភាពទី៥ និងទី៦ របស់រាជរដ្ឋាភិបាល ពាក់ព័ន្ធវិស័យកសិកម្ម។

* សម្តេចធិបតី ហ៊ុន ម៉ាណែត បានថ្លែងអំណរគុណឧបនាយករដ្ឋមន្ត្រី អូន ព័ន្ធមុនីរ័ត្ន, រដ្ឋមន្ត្រីក្រសួងកសិកម្ម និងពាក់ព័ន្ធដែលបានប្រឹងប្រែងរួមគ្នា ឱ្យគោលនយោបាយអាទិភាពរបស់រាជរដ្ឋាភិបាលពាក់ព័ន្ធវិស័យកសិកម្ម ត្រូវបានដាក់ឱ្យអនុវត្តជាមួយដំណើររបស់រាជរដ្ឋាភិបាលមិនទាន់បាន៩០ផង។

* សម្តេចធិបតី ហ៊ុន ម៉ាណែត បានថ្លែងអំណរគុណសម្តេចតេជោ ហ៊ុន សែន ដែលបានផ្តួចផ្តើមកម្មវិធីនយោបាយពាក់ព័ន្ធវិស័យកសិកម្ម។

* សម្តេចធិបតី ហ៊ុន ម៉ាណែត បានថ្លែងថា គ្រាដែលប្រទេសជាច្រើនជួបវិបត្តិស្បៀងពេលជំងឺកូវីដ១៩រាតត្បាត និងវិបត្តិសង្គ្រាមរុស្ស៉ី-អ៊ុយក្រែនជាដើមនោះ បែរជាកម្ពុជាធានាបានសន្តិសុខស្បៀង។

* សម្តេចធិបតី ហ៊ុន ម៉ាណែត បានថ្លែងលទ្ធផលនេះ ទទួលបានដោយសារ​ការដាក់​ចេញគោលនយោបាយមួយបានត្រឹមត្រូវ កត្តាសុខសន្តិភាព និងអំណោយផលផ្នែកធម្មជាតិជាដើម។

* សម្តេចធិបតី ហ៊ុន ម៉ាណែត បានថ្លែងថា គ្រាពិភពលោកមានវិបត្តិមនុស្សអាចផ្អាកការដើរលេង តែមិនអាចផ្អាកការហូបចុកនោះឡើយ។

* សម្តេចធិបតី ហ៊ុន ម៉ាណែត បានថ្លែងថា មិនមែននៅសុខៗគេមកទិញអង្ករពីកម្ពុជានោះទេ គឺកើតចេញពីការប្រឹងប្រែងស្វះស្វែងរកទីផ្សារ។

* សម្តេចធិបតី ហ៊ុន ម៉ាណែត បានថ្លែងថា មិនសំខាន់រឿងកសិករលក់ស្រូវបានថ្លៃនោះទេ អ្វីដែលសំខាន់កសិករសល់បានលុយប៉ុន្មាន?

* សម្តេចធិបតី ហ៊ុន ម៉ាណែត បានថ្លែងថា បច្ចេកវិទ្យាផ្នែកកសិកម្មត្រូវធ្វើទំនើបកម្មជាប្រចាំ ដើម្បីបង្កើនផលិតកម្ម។

* សម្តេចធិបតី ហ៊ុន ម៉ាណែត បានថ្លែងថា អ្នកលក់ចង់បានថ្លៃ អ្នកទិញចង់បានថោក។ ផ្អែកលើបញ្ហានេះ រាជរដ្ឋាភិបាលបានគិតគូរជាប់ប្រចាំ ដើម្បីរក្សាតម្លៃមួយអាចទទួលបានទាំងអស់គ្នា។

* សម្តេចធិបតី ហ៊ុន ម៉ាណែត បានថ្លែងថា ពេលប្រាក់ខែឡើង ហើយទំនិញឡើងដែរ អ៊ីចឹងគឺនៅតែដដែល។

* សម្តេចធិបតី ហ៊ុន ម៉ាណែត អរគុណគណៈកម្មាធិការជាតិគ្រប់គ្រងគ្រោះមហន្តរាយ ដែលបានប្រឹងប្រែងចុះជួយប្រជាកសិកររងគ្រោះទឹកជំនន់នាពេលកន្លងទៅ។

* សម្តេចធិបតី ហ៊ុន ម៉ាណែត បានថ្លែងថា ស្នើឱ្យអ្នករកស៊ីលើវិស័យកសិកម្ម កុំប្រកួតប្រជែងគ្នាឯង រហូតបាត់បង់លទ្ធភាពជាមួយអ្នកខាងក្រៅ។

* សម្តេចធិបតី ហ៊ុន ម៉ាណែត បានថ្លែងថា សេដ្ឋកិច្ចមាត្រដ្ឋាន ចាំបាច់ណាស់ សម្រាប់ធានាការប្រកួតប្រជែង។

* សម្តេចធិបតី ហ៊ុន ម៉ាណែត បានថ្លែងថា ការចងក្រងជាគ្នាសហគមន៍របស់កសិករ គឺមានសារៈសំខាន់ណាស់ សម្រាប់បង្កើនផលិតកម្ម និងដាក់ចេញកិច្ចអន្តរាគមន៍ទាំងឡាយ។

* សម្តេចធិបតី ហ៊ុន ម៉ាណែត ណែនាំឱ្យប្រើប្រាស់កិច្ចអន្តរាគមន៍ដល់កសិករបែបបុរេសកម្ម ជាជាងបែបប្រតិកម្ម។

* សម្តេចធិបតី ហ៊ុន ម៉ាណែត គាំទ្រការចងក្រងសហគមន៍កសិកម្ម ហើយធ្វើឱ្យទំនើបកម្ម។

* សម្តេចធិបតី ហ៊ុន ម៉ាណែត បានឱ្យដឹងថា មៀនប៉ៃលិន របស់កម្ពុជា មានលក់នៅលើអាលីបាបា។

* សម្តេចធិបតី ហ៊ុន ម៉ាណែត ណែនាំឱ្យអ្នកពាក់ព័ន្ធជំរុញកសិផលឡើងលើផ្សារឌីជីថល។

* សម្តេចធិបតី ហ៊ុន ម៉ាណែត បានថ្លែងថា វិធានការអន្តរាគមន៍របស់រាជរដ្ឋាភិបាល ក៏ដូចជាការផ្តល់ឥណទានកសិកម្ម ធ្វើយ៉ាងណាកុំឱ្យប៉ះពាល់ដល់ស្មារតីប្រកួតប្រជែងទីផ្សារសេរី។

* សម្តេចធិបតី ហ៊ុន ម៉ាណែត បានថ្លែងថា រដ្ឋមិនអាចជួយរហូតដល់វិស័យឯកជនមិនប្រឹងនោះទេ។

* សម្តេចធិបតី ហ៊ុន ម៉ាណែត ណែនាំក្រសួងកសិកម្ម ឱ្យចាត់វិធានការលុបបំបាត់សកម្មភាពទាំងឡាយ ដែលធ្វើឱ្យបាត់បង់ការប្រកួតប្រជែងដោយស្មើភាព។

* សម្តេចធិបតី ហ៊ុន ម៉ាណែត ណែនាំឱ្យគិតគូរភ្ជាប់ខ្សែច្រវាក់ផលិតកម្ម និងការផ្គត់ផ្គង់។

* សម្តេចធិបតី ហ៊ុន ម៉ាណែត បានថ្លែងថា បើគង់តែនាំផលិតផលមិនសម្រេចទៅគេ ហើយនាំផលិតផលសម្រេចមកវិញដដែល ដូច្នេះត្រូវពង្រឹងគុណភាពផលិតផលមិនសម្រេចដែលកម្ពុជាមាន ទៅផ្គត់ផ្គង់តាមរោងចក្រដែលត្រូវការវត្ថុធាតុដើមដូចជាកៅស៊ូជាដើម។

* សម្តេចធិបតី ហ៊ុន ម៉ាណែត បានថ្លែងថា កសិកម្មមិនសំខាន់លើបរិមាណនោះទេ តែសំខាន់ការទទួលបានចំណូល។

* សម្តេចធិបតី ហ៊ុន ម៉ាណែត បានថ្លែងថា មិនសំខាន់ថាចិញ្ចឹមអ្វី ឬដាំអ្វីនោះទេ តែឱ្យត្រូវទីផ្សារ ហើយកសិករទទួលបានចំណូល។

* សម្តេចធិបតី ហ៊ុន ម៉ាណែត បានអំពាវនាវដល់ប្រជាពលរដ្ឋខ្មែរ គាំទ្រកសិផលខ្មែរ។

* សម្តេចធិបតី ហ៊ុន ម៉ាណែត បានថ្លែងថា ជ្រើសរើសមន្ត្រីត្រូវឈរលើគោលការណ៍ «ជាប់ដោយមោទនភាព ធ្លាក់ដោយអស់ចិត្ត»។

* សម្តេចធិបតី ហ៊ុន ម៉ាណែត បានថ្លែងថា មន្ត្រីបច្ចេកទេសដែលរើសទៅជួយកសិករ ត្រូវរើសអ្នកដែលចុះជួយជាក់ស្តែង មិនមែនប្រលងយកតែក្របខណ្ឌ ប្រលងហើយទុកចោលនោះទេ។

* សម្តេចធិបតី ហ៊ុន ម៉ាណែត អំពាវនាវដល់យុវជនដែលប្រលងទៅធ្វើជាមន្ត្រីបច្ចេកទេសចុះជួយកសិករ ត្រូវធ្វើការងារដោយបេះដូង។

* សម្តេចធិបតី ហ៊ុន ម៉ាណែត បានថ្លែងថា យើងណែនាំឱ្យកសិករចងក្រងគ្នាជាសហគមន៍ តែពេលខ្លះក្រសួងពាក់ព័ន្ធធ្វើការមិនសហការគ្នា។

* សម្តេចធិបតី ហ៊ុន ម៉ាណែត បានថ្លែងថា សម្តេចនឹងពិនិត្យរចនាសម្ព័ន្ធនៅតាមក្រសួងស្ថាប័នរដ្ឋ ដើម្បីបញ្ចៀសការអនុវត្តន៍តួនាទីភារកិច្ចជាន់គ្នា។

(សូមអានបន្ត)

រសៀលនេះសម្តេចធិបតី និងលោកជំទាវបណ្ឌិត អញ្ជើញជាអធិបតីក្នុងពិធីអបអរសាទរ​ជោគជ័យនៃការរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម

រសៀលនេះសម្តេចធិបតី និងលោកជំទាវបណ្ឌិត អញ្ជើញជាអធិបតីក្នុងពិធីអបអរសាទរ​ជោគជ័យនៃការរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម

នៅរសៀលថ្ងៃសុក្រ ៥កើត ខែកត្តិក ឆ្នាំថោះ បញ្ចស័ក ព.ស២៥៦៧ ត្រូវនឹង​​ថ្ងៃ​ទី១៧ ខែវិច្ឆិកា ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយក​រដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជាឧត្តម​ភរិយា នឹងអញ្ជើញជាអធិបតីក្នុងពិធីអបអរសាទរជោគជ័យនៃការរៀបចំការ​ប្រកួត​កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលរៀបចំឡើង​នៅ​កម្ពុជាជាលើកដំបូង។

ពិធីអបអរសាទរជោគជ័យដ៏ត្រចះត្រចង់ និងប្រកបដោយមោទនភាពនេះ ក៏នឹងមាន​ការ​អញ្ជើញ​ចូល​រួមពីសំណាក់សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់​ព្រះមហា​ក្សត្រ និងជាប្រធានគណៈកម្មាធិការជាតិរៀបចំការប្រកួត​កីឡាស៊ីហ្គេមលើក​ទី​៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣។ ពិធីក៏មានការអញ្ជើញចូលរួមពី​សំណាក់សមាជិក សមាជិការាជរដ្ឋាភិបាល ឯកអគ្គរដ្ឋទូត ឯកអគ្គរាជទូតបណ្តា​ប្រទេស​ជាមិត្តប្រចាំនៅកម្ពុជា ភ្ញៀវកិត្តិយសជាតិ អន្តរជាតិ ព្រមទាំងកីឡាករ កីឡាការិនី សិល្បករ សិល្បការិនីជាច្រើនរូប។

ពិធីនារសៀលថ្ងៃនេះ នឹងមានការបំពាក់គ្រឿងឥស្សរិយយសជូនដែលដល់​អ្នក​ចូលរួមរៀបចំព្រឹត្តិការណ៍ប្រកួត អាហារសាមគ្គី និងមានការបង្ហាញជូន​ផ្ទាំង​ទស្សនីយភាពសិល្បៈមួយចំនួនទៀត។

សូមបញ្ជាក់ថា ឆ្នាំ២០២៣ គឺជាឆ្នាំប្រវត្តិសាស្ត្រមួយដែលកម្ពុជា បានធ្វើជាម្ចាស់ផ្ទះ​រៀប​ចំ​ការប្រកួតកីឡាស៊ីហ្គេមលើក​ទី​៣២ និងអាស៊ានប៉ារ៉ាហ្គេមលើកទី១២ បន្ទាប់​ពី​ទន្ទឹង​​រង់ចាំអស់រយៈពេលប្រមាណជា៦៤ឆ្នាំ។

ការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ត្រូវបាន​បើក​ការប្រកួតតាមការគ្រោងទុកនៅដើមខែឧសភា និងដើមខែមិថុនា ឆ្នាំ២០២៣។ ព្រឹត្តិការណ៍កីឡាទាំងពីរនេះ មានប្រតិភូកីឡាចូលរួមសរុ​ប​រហូតដល់​ទៅជិត ៤ពាន់នាក់។

បើទោះបីកម្ពុជារៀបចំព្រឹត្តិការណ៍កីឡាប្រចាំតំបន់អាស៊ីអាគ្នេយ៍លើកដំបូង តែកម្ពុជា បានបង្កើតឱ្យមានការចាប់អារម្មណ៍ជាច្រើនលើការរៀបចំបើក និងបិទព្រឹត្តិការណ៍ប្រកួត។ ពិធីបើក-បិទស៊ីហ្គេម និងអាស៊ានប៉ារ៉ាហ្គេមជាផ្លូវការ បានបង្កើតនូវ «ភាពភ្ញាក់ផ្អើល និងភាពអស្ចារ្យ» ប្រកបដោយប្រណិតភាព និងភាពឥតខ្ចោះ។ ទស្សនីយភាពនៃពិធីបានជះឥទ្ធិពលពីកម្ពុជាទៅគ្របដណ្ដប់ ប្រជាជាតិទូទាំងពិភពលោក ពិសេសភ្ញាក់ផ្អើលដល់ចលនាអូឡាំពិកអន្តរជាតិ​ដែលមានសមាជិក ២០៥ប្រទេស និងប៉ារ៉ាឡាំពិកអន្តរជាតិដែលមានសមាជិក ២០៨ប្រទេស។ អ្វីដែលលើសពីការរំពឹងទុក គឺអរិយធម៌ អង្គររបស់បុព្វបុរសខ្មែរ និងសក្តានុពលជាតិគ្រប់វិស័យត្រូវបានដាក់បង្ហាញយ៉ាងទាក់ទាញបំផុតធ្វើឱ្យបរទេស កាន់តែស្គាល់បេះដូងខ្មែរពិតប្រាកដ។ មិនតែប៉ុណ្ណោះព្រឹត្តិការណ៍នោះ បាន​ប្រែក្លាយផ្ទាំងទស្សនីយភាពពិធីបើកពីកម្រិតស្តង់ដាព្រឹត្តិការណ៍ ប្រកួតកីឡាតំបន់ ឬទ្វីប ទៅជាពិធីបើកកម្រិតស្ដង់ដាអូឡាំពិកពិភពលោក។

ព្រឹត្តិការណ៍ដែលនាំឱ្យគេភ្ញាក់ផ្អើលថែមទៀតនោះ គឺការសម្រេចចិត្តរបស់សម្តេចតេជោ ហ៊ុន សែន មិនយកថ្លៃស្នាក់នៅ ហូបចុក ដឹកជញ្ជូន ពីប្រតិភូកីឡាចូលរួមទាំងអស់, មិនលក់សំបុត្រចូលទស្សនា​ពិធី​បើក​-បិទ និងការប្រកួតគ្រប់ប្រភេទកីឡា, មិនយកថ្លៃ «សិទ្ធិផ្សាយទូរទស្សន៍» គ្រប់ប្រព័ន្ធផ្សព្វផ្សាយ,
មិនយកថ្លៃទិដ្ឋាការគ្រប់ប្រតិភូកីឡា និងមន្ត្រីបច្ចេកទេសអន្តរជាតិ​មកពីគ្រប់ទិសទីជុំវិញពិភពលោក។

ក្នុងនាមជាម្ចាស់ផ្ទះរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ ដោយទទួលបានការឯកភាពពីក្រុមប្រឹក្សាសហព័ន្ធកីឡាអាស៊ីអាគ្នេយ៍ កម្ពុជាបានដាក់បញ្ចូលប្រភេទកីឡាចំនួន ៣៧រួមមានប្រភេទ កីឡាអូឡាំពិកចំនួន ២៣ និងប្រភេទកីឡាមិនអូឡាំពិកចំនួន១៤ ក្នុងនោះកម្ពុជាបានបញ្ចូលកីឡា អត្តសញ្ញាណជាតិចំនួន ៣ ប្រភេទកីឡាផងដែរ រួមមាន៖ គុនខ្មែរ គុនល្បុក្កតោ និងអុកចត្រង្គ។ ដោយឡែកសម្រាប់ការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ដោយបានការឯកភាពពី សហព័ន្ធកីឡាប៉ារ៉ាអាស៊ាន កម្ពុជាបានដាក់​បញ្ចូល​ប្រភេទកីឡាចំនួន១៣។

ជាលទ្ធផល កម្ពុជាទទួលបានលទ្ធផលបច្ចេកទេសលើសពីការរំពឹងទុក ដែល​ប្រជា​ជន​កម្ពុជាទាំងក្នុង និងក្រៅប្រទេសមានអារម្មណ៍ភ្ញាក់ផ្អើលពីសមត្ថភាពដ៏ខ្លាំងក្លា ទេពកោសល្យដ៏ប៉ិនប្រសព្វ ជំនាញវិជ្ជាជីវៈកីឡា ដ៏គត់មត់ រួមជាមួយការបង្ហាញ​នូវអត្តចរិកសមរម្យ ឥរិយាបថថ្លៃថ្នូរ គោរពបទបញ្ជាការប្រកួត ក្រមសីលធម៌កីឡា គោលការណ៍លេងដោយយុត្តិធម៌របស់អត្តពលិកជាតិទើបអត្តពលិកស៊ីហ្គេមកម្ពុជាដណ្តើមបានមេដាយមាស៨១ មេដាយប្រាក់៧៤ និងមេដាយសំរឹទ្ធ ១២៧ សរុប​ចំនួន​២៨២ ដែលជាកំណត់ត្រាប្រវត្តិសាស្ត្រខ្ពស់ ជាងគេបំផុតសម្រាប់​កម្ពុជា ដែល​បានឈរចំណាត់ថ្នាក់ទី៤ ក្នុងចំណោម១១ប្រទេស។ រីឯអត្តពលិក ប៉ារ៉ាហ្គេម​ក៏បានបង្ហាញពីសមត្ថភាពការតស៊ូ និងទេពកោសល្យជំនាញកីឡា យ៉ាងប៉ិនប្រសព្វធ្វើឱ្យមហាជនកោតសរសើរ គោរពឱ្យតម្លៃគ្រប់ៗគ្នា។ ក្នុងនោះ លទ្ធផលបច្ចេកទេសក៏បានទទួលលើសពីការគ្រោងទុក គឺមេដាយមាស៩ មេដាយ​ប្រាក់១៩ និងមេដាយសំរឹទ្ធ៤៥ សរុបចំនួន៧៣ កម្ពុជាស្ថិតនៅចំណាត់ថ្នាក់ លេខ​៨ ក្នុងចំណោម១១ប្រទេស។

ជាមួយគ្នានេះ ប្រាក់រង្វាន់របស់រាជរដ្ឋាភិបាល និងប្រាក់រង្វាន់លើកទឹក​ចិត្តផ្ទាល់​របស់សម្ដេចតេជោ និង សម្ដេចកិត្តិព្រឹទ្ធបណ្ឌិត បានប្រគល់ជូនដល់អត្តពលិកជ័យ​លាភីស៊ីហ្គេម និងអាស៊ានប៉ារ៉ាហ្គេម រួចរាល់ ក្រោមអធិបតីភាពរបស់ សម្តេចពិជ័យសេនា ជាតំណាងដ៏ខ្ពង់ខ្ពស់បំផុតរបស់ សម្ដេចតេជោ។ រីឯ ប្រាក់រង្វាន់របស់ក្រុមហ៊ុនសប្បុរសជននានាក៏ត្រូវបានប្រគល់ជូនដល់អត្តពលិកជ័យលាភីរួចរាល់ផងដែរ។

តាមរយៈការរៀបចំការប្រកួតកីឡាទាំងពីរនេះ កីឡាអត្តសញ្ញាណជាតិ ត្រូវបាន​លើក​កម្ពស់គុណតម្លៃខ្ពស់ត្រដែត ផ្សព្វផ្សាយពាសពេញប្រទេស និងលើ ឆាកអន្តរ​ជាតិ
ហើយកម្ពុជាក៏ដណ្ដើមបានឧត្តមភាពមេដាយខ្ពស់លើប្រភេទកីឡាអត្តសញ្ញាណជាតិទាំងបីគឺ គុនខ្មែរ គុនល្បុក្កតោ និងអុកចត្រង្គ។ ពិសេសជាងនេះ គុនខ្មែរ និងគុនល្បុក្ក​តោ ត្រូវបានក្រុមប្រឹក្សា សហព័ន្ធកីឡាអាស៊ីអាគ្នេយ៍អនុម័ត និងសម្រេចដាក់បញ្ចូលលក្នុងធម្មនុញ្ញសហព័ន្ធកីឡាអាស៊ីអាគ្នេយ៍
បានយ៉ាងជោគជ័យសម្រាប់អនាគតនៃការបន្តអភិវឌ្ឍកីឡាយុទ្ធគុនខ្មែរទាំងពីរលើឆាកអន្តរជាតិ។

ការទទួលបដិសណ្ឋារកិច្ច ការស្នាក់នៅ ហូបចុក ដឹកជញ្ជូន ការរៀបចំការពារ​សន្តិសុខ សុវត្ថិភាព សណ្តាប់ធ្នាប់ របៀបរៀបរយសាធារណៈ និងអនាម័យ ផ្នែកការរៀបចំសុខាភិបាល សង្គ្រោះ និងព្យាបាល អំឡុងពេលប្រកួត បានប្រព្រឹត្តទៅ​យ៉ាងរលូនតាមការគ្រោងទុក និងមិនមានបញ្ហាអ្វីមួយកើតឡើងគួរឱ្យកត់សម្គាល់ឡើយ។ ផ្ទុយទៅវិញ តែងទទួលបាននូវការកោតសរសើរ និងវាយតម្លៃខ្ពស់ពីអ្នកចូលរួមទាំងអស់។ ពិសេស ភូមិកីឡាបានបន្ថែមពិន្ទុឱ្យកម្ពុជាជាប់ក្នុងប្រទេសម្ចាស់ផ្ទះ ដែលគោរពតាមស្តង់ដា ស្នាក់នៅ ហូបចុក កម្រិតលក្ខខណ្ឌតម្រូវរបស់​កីឡាអូឡាំពិក។

ទីលានប្រកួតកីឡាទាំងអស់ត្រូវបានរៀបចំកម្រិតស្តង់ដាកីឡាអន្តរជាតិ និងបានគោរពតាមនិយាមនៃបទប្បញ្ញត្តិបច្ចេកទេសរបស់សហព័ន្ធកីឡាអន្តរជាតិ ពិសេស ការបំពាក់ឧបករណ៍សម្ភារៈបច្ចេកទេស ឧបករណ៍ សម្ភារៈវិនិច្ឆ័យការ​ប្រកួតឧបករណ៍បច្ចេកវិទ្យាកំណត់ពេលវេលា និងកំណត់ពិន្ទុ ការតុបតែង សោភ័ណភាពក្នុង​ទីលានប្រកួតបានរៀបចំឡើង ស្របតាមទស្សនាទានកីឡាកម្រិតខ្ពស់។

សូមបញ្ជាក់ដែរថា ព្រឹត្តិការណ៍ប្រកួតកីឡាទាំងពីរនេះ ត្រូវបានគណៈកម្មាធិការ​អូ​ឡាំ​​ពិកអន្តរជាតិ បានវាយតម្លៃខ្ពស់ចំពោះស្នាដៃ និងការយកចិត្តទុកដាក់ខ្ពស់​របស់សម្ដេចតេជោ ហ៊ុន សែន ដោយបានប្រគល់មេដាយមរតកអូឡាំពិកខ្ពស់​បំផុត​ជូនសម្ដេចតេជោ
ដែលជាសក្ខីភាពដ៏ឧត្តុង្គឧត្តមនៃមោទនភាពជាតិសម្រាប់ប្រជាជនកម្ពុជាទាំងមូល។

ចលនាអូឡាំពិកអន្តរជាតិ និងចលនាប៉ារ៉ាឡាំពិកអន្តរជាតិ បានវាយតម្លៃខ្ពស់ ចំពោះ​រាជរដ្ឋាភិបាល គណៈកម្មាធិការរៀបចំការប្រកួត ប្រជាជនកម្ពុជា ដែលបាន​ប្រមូលអស់លទ្ធភាព សមត្ថភាព និងឆន្ទៈ មោះមុត បង្កើតភាព​អស្ចារ្យក្នុងចលនា​អូឡាំពិក-ប៉ារ៉ាឡាំពិក ដោយគោរពតាមស្ដង់ដា​អូឡាំពិកអន្តរជាតិ-ប៉ារ៉ាឡាំពិក​អន្តរជាតិ​យ៉ាងល្អប្រសើរ។

គណៈកម្មាធិការជាតិអូឡាំពិក និងប៉ារ៉ាឡាំពិកគ្រប់ប្រទេសជាសមាជិកចូលរួម បានកោតសរសើរ និងវាយតម្លៃខ្ពស់ចំពោះការលើកកម្ពស់ព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឈានដល់កម្រិតអូឡាំពិក និងប៉ារ៉ាឡាំពិកអន្តរជាតិ និងផ្ដល់នូវភាពអស្ចារ្យឱ្យកាន់តែល្បីល្បាញ និងទាក់ទាញការគាំទ្រយ៉ាងខ្លាំងពី គ្រប់ទិសទី។ ក្នុងនោះដែរ ព្រឹត្តិការណ៍អាស៊ានប៉ារ៉ាហ្គេម ក៏បានទទួលស្គាល់ស្តង់​ដា​រៀបចំល្អប្រសើរជាងលើកមុនៗ ហើយផ្តល់តម្លៃដល់អត្តពលិកមានពិការភាព​ខ្ពស់ក្នុង​នាមជាម្ចាស់ផ្ទះរៀបចំ៕

(សូមអានបន្ត)

អភិបាលខេត្តបាត់ដំបង នាំយកស្បៀងសង្រ្គោះបន្ទាន់របស់សម្ដេចធិបតី ហ៊ុន ម៉ាណែត ចែកជូនពលរដ្ឋដែលរងផលប៉ះពាល់ដោយគ្រោះរាំងស្ងួត និងគ្រោះទឹកជំនន់ជាង១ពាន់គ្រួសារ នៅស្រុកសំពៅលូន និងស្រុកកំរៀង

 អភិបាលខេត្តបាត់ដំបង នាំយកស្បៀងសង្រ្គោះបន្ទាន់របស់សម្ដេចធិបតី ហ៊ុន ម៉ាណែត ចែកជូនពលរដ្ឋដែលរងផលប៉ះពាល់ដោយគ្រោះរាំងស្ងួត និងគ្រោះទឹកជំនន់ជាង១ពាន់គ្រួសារ នៅស្រុកសំពៅលូន និងស្រុកកំរៀង

(បាត់ដំបង)៖ លោក សុខ លូ អភិបាលខេត្តបាត់ដំបង និងជាប្រធានគណៈកម្មាធិការគ្រប់គ្រងគ្រោះមហន្ដរាយខេត្ត នៅថ្ងៃទី១៧ ខែវិច្ឆិកា ឆ្នាំ២០២៣នេះ បានអញ្ជើញជួបសំណេះសំណាលសួរសុខទុក្ខ និងនាំយកអំណោយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ផ្ដល់ជូនដល់ប្រជាពលរដ្ឋដែលរងផលប៉ះពាល់ ដោយសារគ្រោះរាំងស្ងួត និងគ្រោះទឺកជំនន់ ចំនួនជាង១ពាន់គ្រួសារ ក្នុងនៅស្រុកសំពៅលូន ១១៨គ្រួសារ និងស្រុកកំរៀង ១,៥០៨គ្រួសារ។

ក្នុងឱកាសនោះ លោក សុខ លូ បានថ្លែងអំណរគុណយ៉ាងជ្រាលជ្រៅជូនចំពោះ សម្ដេចមហាបវរធិបតី ហ៊ុន ម៉ាណែត ដែលតែងតែគិតគូរដល់សុខទុក្ខដល់ប្រជាពលរដ្ឋ គ្រប់ពេលវេលា ជាក់ស្ដែងនៅថ្ងៃនេះ តាមរយៈគណៈកម្មាធិការគ្រប់គ្រងគ្រោះមហន្តរាយ បានចាត់ឲ្យក្រុមការងារចុះចែកអំណោយ និងផ្ដល់គ្រាប់ពូជស្រូវ ជូនប្រជាពលរដ្ឋណាដែលរងផលប៉ះពាល់ និងមានប្រភពទឹកគ្រប់គ្រាន់ក្នុងការស្ដារឡើងវិញ ដែលនេះជាការបង្ហាញការយកចិត្តទុកដាក់របស់សម្ដេចដល់ប្រជាពលរដ្ឋតាំងពីពេលមានបញ្ហាដោយសារទឹកជំនន់ រហូតមកដល់បច្ចុប្បន្ននេះ។

លោកបានបន្តថា ចំពោះស្បៀងអាហារដែលប្រគល់ជូននាពេលនេះ មិនអាចបានយូរអង្វែងទេ តែគឺជាការសម្រាលបន្ទុកបានមួយរយៈពេលផងដែរ ហើយក្នុងនោះ បានធ្វើការចែកចំពោះប្រជាពលរដ្ឋដែលរងផលប៉ះពាល់ និងមានជីវភាពលំបាក ដូចនេះសូមធ្វើការអធ្យាស្រ័យពីសំណាក់ប្រជាពលរដ្ឋ។

លោកបានបន្តទៀតថា បច្ចុប្បន្ននេះ រាជរដ្ឋាភិបាល នៅតែមានគោលនយោបាយផ្ដល់បណ្ណសមធម៌ ប័ណ្ណហានិភ័យសម្រាប់ប្រជាពលរដ្ឋ ដែលងាយធ្លាក់ក្នុងបន្ទាត់ក្រីក្រ ប្រជាពលរដ្ឋដែលក្រីក្រ រដ្ឋាភិបាលឧបត្ថម្ភជាថវិកាប្រចាំខែ ផ្ដល់នូវការព្យាបាលជំងឺដោយឥតគិតថ្លៃជាដើម ដែលសម្រាលបន្ទុកយ៉ាងច្រើន ដល់ប្រជាពលរដ្ឋដែលងាយរងហានិភ័យ និងប្រជាពលរដ្ឋក្រីក្រ។

ទន្ទឹមនឹងនោះដែរ ប្រជាពលរដ្ឋត្រូវតែខិតខំប្រកបរបរ និងចូលរួមជាមួយរាជរដ្ឋាភិបាល ក្នុងការចូលរួមអភិវឌ្ឍន៍ប្រទេសជាតិ ចូលរួមរក្សាសន្ដិភាពប្រទេស ដើម្បីឲ្យប្រទេសកម្ពុជាកាន់តែបន្តរីកចម្រើនទៅមុខផងដែរ៕

(សូមអានបន្ត)